Shëndeti i qytetarëve është i rrezikuar nga produktet jocilësore

Foto ilustrim

Shëndeti i qytetarëve të Kosovës është ende i  rrezikuar nga produktet jocilësore dhe nga tregtarët mashtrues me mallra të kontrabanduara.

Me rastin e Ditës Botërore të Konsumatorit, kryetari i Organizatës “Konsumatori”, Selatin Kaçaniku, ka deklaruar se ndër problemet më të mëdha janë mallrat e kontrabanduara, që, sipas tij, është alarmante në Kosovë.

Ai ka thënë se vetëm 1 për qind e mallrave të importuara i nënshtrohen kontrollit për cilësi dhe kjo parqet pasiguri për qytetarët. Ndërsa, në tryezën me temën “Të drejtat e konsumatorit në Kosovë”, ministri Tregtisë dhe Industrisë,  Bajram Hasani, tha se mbrojtja e konsumatorit ka të bëjë me ruajtjen e shëndetit dhe të sigurisë së konsumatorëve, përcjell albinfo.ch

Ai bëri me dije se qytetarët e Kosovës mund të lajmërojnë në linjat telefonike në çdo kohë, kur shkelen të drejtat e tyre. Hasani kërkoi nga konsumatorët që të ndihmojnë ministrinë, pasi ka mungesë të inspektorëve. Sherif Fejzullahu, nga Këshilli për mbrojtjen e konsumatorit, tha se edhe përkundër faktit që në Kosovë ka ligje, të cilat e mbrojnë konsumatorin, problemi qëndron te moszbatimi i tyre.