Rama për “Die Welt”: Është paradoks që s’jemi anëtare e BE

Kryeministri shqiptar, Edi Rama, ka kryer një intervistë me gazetën konservatore gjermane “Die Welt”, ku ka paralajmëruar BE-në që të mos zvarrisë procesin e integrimit, pasi atëherë mund të rriten ndikimet e forcave të treta, informon albinfo.ch.

Foto ilustrim

“Nuk është mirë për BE, që Ballkanin ta trajtojë si zonë gri, ku do të bisedohej me një palë të tretë,” tha Rama. “Gjithashtu nuk duhet të harrohet se ne jemi anëtare të NATO. Është paradoks, që ne nuk jemi anëtare të BE. Nuk e keni parë se deri ku mund të shkonte ndikimi rus në Malin e Zi. Një qeveri anti-Nato ose Anti-BE tani është një realitet i mundur.”

Më pas Edi Rama sqaron se detyrat janë përmbushur nga Shqipëria dhe se tani pret fillimin e negociatave. Përveç reformave në drejtësi, ai tha se Shqipëria ka ashpërsuar kontrollet në kufi, për të zvogëluar numrin e shqiptarëve që lëshojnë vendin dhe kërkojnë punë në BE. Megjithatë, Edi Rama këtu merr shembull kroatët.

Në krahasim me vendet tjera shqiptarët po trajtohen më keq: “Krahasimi nuk është i drejtë. Vitin e kaluar kishte 50.000 kroatë, të cilët lëshuan vendin e tyre. Por këta nuk i numëron askush, sepse janë shtetas të BE. Ata kërkojnë diku tjetër punë dhe kjo për ta vlen normale. Nëse këtë e bëjnë shtetasit tanë, ata duhet të aplikojnë për azil, sepse nuk kanë të drejtë në tregun e punës së BE.”

Para një jave kryeministri shqiptari pati një intervistë me prestigjiozen britanike “Financial Times”, ku pati deklaruar se “Ballkani është në rrezik nga ndikimi rus.”