Zaev paralajmëron referendum për emrin

Ai deklaroi se do të mbahet një referendum në shtator ose në tetor, për çfarëdo zgjidhje që do të gjendet dhe se parlamentet e të dy vendeve do të duhet të ratifikojnë marrëveshjen paraprakisht

Kryeministri i Maqedonisë, Zoran Zaev, tha se për çdo emër të ri për vendin, për të cilin Greqia fqinje do të bjerë dakord, do të mbahet një referendum muajt e ardhshëm të këtij viti.

Zoran Zaev tha se Shkupi dhe Athina nuk kanë qenë kurrë më afër arritjes së një marrëveshjeje mbi emrin e Maqedonisë, i cili ka qenë subjekt i një mosmarrëveshjeje të gjatë 25-vjeçare.

Qeveria e Maqedonisë është zotuar të ndryshojë emrin e Republikës për të adresuar shqetësimet greke, se emri aktual nënkupton pretendime territoriale në një provincë në veri të Greqisë me të njëjtin emër, Maqedoni. Në kthim, Athina ka premtuar të mos bllokojë më anëtarësimin e Maqedonisë në NATO dhe në Bashkimin Evropian.

Zaev deklaroi se do të mbahet një referendum në shtator ose në tetor, për çfarëdo zgjidhje që do të gjendet dhe se parlamentet e të dy vendeve do të duhet të ratifikojnë marrëveshjen paraprakisht.