Pritje e ngrohtë për kryetarin e Skenderajt në “qytetin e trëndafilave”, Rapperswil-Jona

Në qendër të takimit të dy kryetarëve është këmbimi i përvojave në veçanti nga organizimi administrativ, zhvillimi i komunave përkatëse dhe sigurisht, arsimi

Kryetari i Komunës së Skënderajt, Bekim Jashari, është duke zhvilluar një vizitë në Komunën Rapperswil-Jona të Kantonit St.Gallen të Zvicrës. Ai është pritur nga kryetari i kësaj komune, të dytës për nga madhësia në kanton, Martin Stökling dhe stafi i tij.

Jashari, i cili prej afër një viti drejton Skenderajn si kryetar jashtëpartiak, në këtë vizitë është shoqëruar nga drejtori për arsim në komunën e tij, Bekim Latifi, konsulli në Konsullatën e Kosovës në Cyrih, Visar Rrecaj etj.

Ndërsa në pritjen te kryetari, në selinë e tij në qendrën historike të qytetit të vjetër të Rapperswilit kanë qenë të pranishëm edhe Akenbut Iballi dhe Naim Zeqiri, krerë të shoqatës “Pro Kosova”, e cila ka qenë iniciatore e zhvillimit të këtij takimi, si dhe Don Marjan Demaj, kryefamullitar në famullinë e regjionit Sargans të Kantonit St. Gallen, shkruan albinfo.ch nga vendi i ngjarjes.

Në qendër të takimit të dy kryetarëve është këmbimi i përvojave në veçanti nga organizimi administrativ, zhvillimi i komunave përkatëse dhe sigurisht, arsimi.

Fuzionimi i bërë para dhjetë vitesh i komunave Rapperswil dhe Jona është nënvizuar nga kryetari mikpritës si një hap i mençur dhe është dëshmuar tashmë në praktikë si veprim pozitiv. Edhe mysafiri nga Kosova ka shprehur interesim lidhur me strukturën administrative të komunës Rapperswil-Jona. Ky qytet, i cili pas bashkimit numëron 27 mijë banorë, njihet edhe për bukurinë që e karakterizon, falë shtrirjes së tij buzë liqenit të Cyrihut, kështjellës impozante dhe qendrës historike. Ndryshe, Rapperswili njihet si “qytet i trëndafilave”.

Delegacioni i kryesuar nga kryetari Jashari do të vizitojë pasditen e sotme edhe Shkollën e Lartë Teknike të Rapperswilit dhe një ndërmarrje ekonomike.

Në pritjen e bërë fillimisht në oborrin e ndërtesës së komunës, në një bashkëbisedim spontan mes dy kryebashkiakëve, nuk u anashkalua edhe segmenti më aktual i marrëdhënieve të ngushta Zvicër-Kosovë, gjegjësisht zhvillimet interesante lidhur me pjesëmarrësit me prejardhje shqiptare të Kombëtares zvicerane të futbollit.

Në këtë atmosferë, kryetari i Skenderajt, në një gjermanishte solide, i tha homologut të tij se suksesi i fundit i Zvicrës ka qenë më emocionuesi për të dhe shqiptarët në përgjithësi, pas fitoreve të kombëtares shqiptare ose asaj kosovare, shkruan albinfo.ch. Edhe mikpritësi i tij shprehu kënaqësinë me integrimin e gjithanshëm të kosovarëve në Zvicër, i cili pasqyrohet më së miri me lojtarët shqiptarë me prejardhje nga Kosova në Nati-n zviceran.