“Ditët e Diasporës”, hapet panairi me produkte vendore

Në hapje kanë marrë pjesë ministri i Diasporës, Dardan Gashi dhe zv. kryeministri Fatmir Limaj

Në Prishtinë është hapur panairi me produkte vendore që bëhet në kuadër të Ditëve të Diasporës që do të jetë i hapur deri të shtunën. Në hapje kanë marrë pjesë ministri i Diasporës, Dardan Gashi dhe zv. kryeministri Fatmir Limaj.  

Ministri i Diasporës, Dardan Gashi, ka deklaruar se produktet e këtij panairi kanë një lidhje të veçantë me diasporë. Gashi po ashtu ka treguar se në fillim të gushtit do të mbahen dy aktivitete kryesore, njëra në Prekaz e tjetra në Prishtinë, në kuadër të manifestimeve për Ditët e Diasporës. 

 “Është kënaqësi e veçantë kur diaspora vjen t`i vizitojë familjet, dhe takohen me njerëzit, është një lidhje e veçantë e diasporës me këto prodhime, ne kemi marrëveshje që këto produkte të shiten në vendet ku është diaspora”, tha ai.  E Limaj ka thënë se Qeveria ka plan të veçantë për bashkatdhetarët që, sipas tij, synon të lehtësojë ardhjen e diasporës në vendlindje. 

 “Neve na ka rastisur t`i shohim prodhimet tona në vende të Evropës, kjo ka ardhur në saje të biznesit që e bënë diaspora me prodhimet vendore, nuk ka familje në diasporë që nuk e ka një veshje kombëtare, një shenjë kombëtare, shumë shpejt do të nxirret një plan se si t’i afrojmë njerëzit e diasporës për çështjen e udhëtimit, çështjen e biletave, e tjera”, ka thënë Limaj.