Në sektorin privat punëtorët paguhen vetëm 170 euro 

Në tregun e punës në Kosovë, punëdhënësit paguajnë punëtorët edhe me pagë më të ulët se ajo që është e përcaktuar si pagë minimale, thonë hulumtimet që kanë bërë disa nga organizatat ekonomike.

Aktualisht, paga minimale në Kosovë është 130 euro për të punësuarit e moshës nën 35 vjeç, dhe 170 euro për të punësuarit e moshës mbi 35 vjeç, pagë kjo e cila nuk ka pësuar ndryshime që nga viti 2011.

Avni Ajdini, kryetar i Sindikatës së Bashkuar për Arsim, Shkencë dhe Kulturë, ka thënë për Radion Evropa e Lirë se në sektorin privat punohet 12 orë dhe punëtori paguhet për 8 orë dhe për numrin e orëve që ai punon paguhet më pak se paga minimale.

Kjo zakonisht ndodh në sektorin e pastrimit”, ka thënë Ajdini. Sipas tij, ankesa të punëtorëve ka, por jo me shkrim, pasi ekziston frika se mund të përjashtohen tërësisht nga puna.

Ndërkohë, BSPK-ja ka aprovuar në Këshillin Ekonomik Social një pagë minimale 250 euro. Qeveria kishte premtuar se kjo do të realizohet nga janari, por deri tash nuk e ka futur në fuqi këtë vendim.

---