Atmosferë e mirë te Kosova para ndeshjes me Azerbajxhanin

Kosova do të ndeshet me Azerbajxhanin të premten, derisa të hënën e pret Ishujt Faroe

Kosova po i mban stërvitjet në stadiumin “Fadil Vokrri” në Prishtinë. Një stërvitje jo edhe me intensitet të lartë, por me fokus në mbrojtje dhe me kundërzbritje.

Përzgjedhësi Bernard Challandes theksoi se do të punojë shumë në repartin mbrojtës, duke marrë parasysh mungesën e mbrojtësve dhe se është i përcaktuar që ta ngrisë nivelin e ekipit në përgjithësi, përcjell albinfo.ch.

“Është kënaqësi të stërvitësh në stadiumin “Fadil Vokrri”, ndërsa po e ndjejmë madhështinë e tij këtu që aq shumë dëshironte që të luanim këtu. E vështirë pa të, por ne do të luajmë e do të angazhohemi maksimalisht për të dhe për gjithë Kosovën. Atmosfera në mesin tonë është mjaft e mirë dhe ne besojmë shumë që do të kemi rezultate të favorshme”, është shprehur Samir Ujkani, kapiten i Kosovës.

“Patëm stërvitjen e parë e cila kaloi mjaft mirë. Po koordinohemi gjithnjë e më shumë dhe më mirë. Do të punojmë me intensitet më lartë gjatë këtyre ditëve në mënyrë që të jemi plotësisht të gatshëm për ndeshjen me Azerbajxhanin”, ka thënë Arbër Zeneli.

“Më në fund jemi në shtëpinë tonë, në stadiumin që e mbanë emrin e legjendës “Fadil Vokrri”, që ai e dëshironte shumë këtë stadium. Në stërvitjen e parë punuam mirë dhe do të koordinojmë bashkëveprimet tona dhe unë besoj se të gjithë ne duam që të shënojmë rezultate të mira”, theksoi Benard Berisha.

---