Mediat gjermanofone njëzëri: Mbështetni referendumin e 30 shtatorit

Televizioni gjermanofon “ARD” thekson se bëhet fjalë “për gjithçka ose asgjë; për të ardhme ekonomike ose agoni të tejzgjatur.”.

Ngjashëm si liderët perëndimorë edhe gazetarët perëndimorë kanë vizituar dhe i japin jehonë referendumit të 30 shtatorit në Maqedoni, shkruan albinfo.ch.

“Rreth dy milion maqedonas duhet të votojnë këtë të dielë për të vendosur nëse shteti i tyre në të ardhmen të quhet Maqedonia Veriore,” shkruan media më me ndikim në Gjermani, “Süddeutsche Zeitung”. “Maqedonia është kthyer në mollë sherri mes Perëndimit dhe Rusisë, e cila po u jep kahje tjetër zhvillimeve mbi Ballkanin.”

Prestigjiozja austriake “Der Standard” gjithashtu shkruan për rëndësinë e referendumit dhe rrezikun që Maqedonia të kthehet drejt orientimit rus. “Rusia në fakt mbështet një parti, e cila është kundër anëtarësimit në NATO,” përcjell albinfo.ch. “Poashtu presidenti pro-rus Gjorgje Ivanov ka thirrur për bojkot në referendum. Por janë qytetarët ata që duhet ta bekojnë këtë marrëveshje.”

Televizioni gjermanofon “ARD” thekson se bëhet fjalë “për gjithçka ose asgjë; për të ardhme ekonomike ose agoni të tejzgjatur.”.

Referendumi në Maqedoni mbahet në 30 shtator dhe duhet të dalin mbi 50 përqind e votuesve për të qenë i suksesshëm. Këtu duhet të veprojnë shqiptarët, të cilët për të mbajtur larg ndikimin serbo-rus, të votojnë pro-Nato dhe pro-BE duke rrethekuar përgjigjen “po”. Në rast të kundër çështja do shkojë në parlament, ku nevojiten dy të tretat e votave, gjë që qeveria e tanishme nuk i ka.

---