Filmi gjerman që po xhirohet në Kalanë e Rozafës

Producenti Jurgen Zinke shprehet se ishte ide shumë e mirë, pasi Shqipëria është një vend i panjohur

Kalaja e Rozafës, e ngritur mbi një kodër shkëmbore në perëndim të qytetit të Shkodrës ka zgjuar interesin e 40 aktorëve gjermanë për të xhiruar filmin e tyre më të ri “Vampirët”.

Aktorët e Forum Heersum, shoqatë socio-kulturore nga Saksonia e Poshtme në Gjermani kanë ardhur të xhirojnë në Shkodër skenat e filmit, shkruan agjencia gjermane e lajmeve “Deutche Welle”.

Artistët e kanë zbuluar kalanë nga aktorja e njohur shkodrane që jeton prej 27 vitesh në Gjermani, transmeton “ATSH”.

Juli Ndoci shprehet se “të gjithë aktorët erdhën më shumë dëshirë në Shqipëri dhe asnjë prej tyre nuk është penduar, por është tmerrësisht i lumturuar për atë çfarë sheh dhe përjeton, sesi janë njerëzit sesi është ushqimi sesi është historia të cilën pak njerëz e dinë”, përcjell albinfo.ch.

Filmi me metrazh të shkurtër do të shfaqet verën e ardhshme para publikut në Gjermani, përcjell albinfo.ch.

Producenti Jurgen Zinke shprehet se ishte ide shumë e mirë, pasi Shqipëria është një vend i panjohur.

“Ne kemi kënaqësi të kemi pjesë të stafit tonë Juli Ndocin, që e njeh Shqipërinë kaq mirë dhe s’mund të kishim xhirime më të mira”.

Ndërsa regjisori Ulli Jaeckle thotë se “natyrisht shesh xhirimi është shumë i rëndësishëm. Lokalizimi këtu në Shqipëri lidhet edhe me faktin se këtu ka vende fantastike dhe për ne gjermanët Shqipëria është e panjohur”.

“Këtu ka vende madhështore, ku mund të shkosh pa problem, të cilat në Gjermani do t’i kishin bllokuar për publikun”, shprehet regjisori Jaeckle.

Oliver e ka njohur Shkodrën si vendlindja e gruas së tij, Julit. “Për një “vampir” nuk ka gjë më të mirë se sa të vijë këtu, sepse është vend interesant e ka turistë”, thekson ai.

E lashta kala e Rozafës, në Shkodër vizitohet çdo ditë e më tepër nga të gjitha moshat, vend atraktiv ku historia, arkitektura, peizazhi fantastik ndërthuren në mënyrë të përkryer. Numri i vizitorëve është gjithnjë në rritje në këtë atraksion turistik, i cili përveç bukurive mban dhe misterin e historisë së Rozafës.

---