Gola të bukur nga Shaqiri e Xhaka

Paraqitjet e futbollistëve shqiptarë në pesë ligat kryesore evropiane

Kjo fundjavë ishte e suksesshme për futbollistët shqiptarë që luajnë në ligat evropiane.

Xherdan Shaqiri ka gjetur golin e parë zyrtar me Liverpoolin. Edhe pse hyri në lojë në pjesën e dytë, Shaqiri shënoi një gol të bukur në fitoren prej 4:1 ndaj Cardiffit, shkruan albinfo.ch.

Një super gol ka shënuar Granit Xhaka për Arsenalin që u ndal nga Crystal Palace. Xhaka realizoi nga gjuajtja e lirë për rezultatin e përkohshëm 1:1, derisa ndeshja përfundoi 2:2, me vendasit që shënuan dy herë nga penalltia, ku dy penalltitë i shkaktuan Xhaka dhe Shkodran Mustafi.

Ndërkohë, Florent Hadërgjonaj nuk luajti për Huddersfield që humbi 3:0 nga Watford.

Në Spanjë, Levante mundi Leganes 2:0, ku Enis Bardhi luajti 90 minuta, kurse Armando Sadiku vazhdon të jetë i lënduar.

Në Itali luajtën shumë futbollistë shqiptarë. Etrit Berisha u rikthye titullarë për Atalantën që mundi Parmën 3:0, derisa Berat Gjimshiti ishte në bankën rezervë.

Për Bolognën, Blerim Xhemaili hyri në lojë në minutën e 65-të, në barazimin 2:2 me Sassuolon në udhëtim. Valon Behrami ishte titullar për Udinese që barazoi 2:2 me Genoan. Kapiteni Behrami luajti deri në minutën e 63-të. Elseid Hysaj luajti 70 minuta për Napolin në barazimin 1:1 kundër Romës.

Në Gjermani, Milot Rashica hyri në lojë në minutën e 70-të për Werderin që u mposht 6:2 në shtëpi nga Bayer Leverkusen.

https://www.youtube.com/watch?v=pKIW_L5JbL8

https://www.youtube.com/watch?v=PDwizx8terQ

---