Rama: Të rinjtë jo më në klube të natës

Masa tjetër nga kryeministri shqiptar Edi Rama, pasi ditë më parë ka bërë të ditur se do të mbyllen bastoret dhe kazinotë

Kryeministri i Shqipërisë, Edi Rama ka dalë me një deklaratë për mediat duke e përqendruar vëmendjen te minorenët, duke u shprehur se përveç miratimit të vendimit për të ndaluar përdorimin e alkoolit nga të rinjtë nën 18-vjeç, këtyre grupmoshave do t’u ndalohet edhe aksesi në klubet e natës.

“Do të ndalohet frekuentimi i adoleshentëve në klubet e natës. Vetëm kur të jenë të shoqëruar me prindër apo mësues, ndryshe do të jetë e ndaluar rreptësishtë. Masat do të jenë të rënda, që do të shkojë deri në mbylljen e lokaleve për një vit duke ua bërë të pamundur dhënien me qira të ambienteve”, është shprehur Rama, transmetojnë mediat shqiptare.

Sipas Ramës, ligji për ndalimin e alkoolit do të shkojë i pari në Kuvendin e Shqipërisë, pasi situata ka eskaluar dhe nuk tolerohet më, duke paralajmëruar kështu edhe gjoba të majme për subjektet që nuk do e zbatojnë këtë ligj, përcjell albinfo.ch.

“Ndëshkimet do të jenë ekstreme. Pas mbylljes së pikave të basteve dhe lojërave të fatit, ana tjetër është mbrojtja e domosdoshme e adoleshentëve nga alkooli. Gjërat kanë shkuar në një pikë që nuk mund të tolerohet më në bashkëpunim me shkollën dhe prindërit”, theksoi kryeministri shqiptar.

---