Bizneset në Maqedoni kundërshtojnë tatimin progresiv

Paralajmërimi i Qeverisë së Maqedonisë  për reforma të reja tatimore ka ngjallur reagime të shumta në këtë vend.

Më të zëshmit kanë qenë bizneset që thonë se nuk do ta pranojnë tatimin progresiv, pasi thonë se kanë qenë të kënaqur me tatimin e deritanishëm të sheshtë prej 10%.

“Tatimi i ri më shumë do ta godasë shtresën e mesme, ndërsa efektet ndaj buxhetit do të jenë shumë të vogla. Shtresa e mesme që ka arritur të krijojë standard më të mirë të jetës diku prej 100 deri 120 mijë denarë gjatë vitit, këto janë intelektualët, artistët, profesorët e fakulteteve, shtresa që më shumë na nevojitet dhe vazhdimisht kemi largime nga Maqedonia”, është shprehur biznesmeni  Goran Rafajllovski.

Kundër ka dalë edhe Oda Ekonomike e Maqedonisë, e cila ka caktuar takim të jashtëzakonshëm.  

“Nuk duhet shpejtuar me miratimin e masave të këtilla, duke pasur parasysh që dispozitat për vlerësimin e ndikimit të rregullativës parashikojnë afate të saktë dhe veprimet që duhet të ndërmerren për zbatimin e konsultimeve me të gjitha palët e përfshira”, ka thënë në një konferencë për media Tatjana Shterjova nga Oda Ekonomike.

Reforma tatimore parasheh tatim progresiv prej 18% për të ardhura prej mbi 90 mijë në muaj, ku përfshihen pagat, pensionet, kontratat në vepër, të drejtat autoriale dhe veprimtaritë e pavarura.

Me 15 për qind do të tatohen fitimet kapitale, gjegjësisht qiratë, dividentat, fitimet nga lojërat e fatit etj.