Spanja pranon të luajë me Kosovën

Keystone EPA/VALDRIN XHEMAJ

Federata e Futbollit të Spanjës do të pranojë të luajë ndaj Kosovës dhe do t’i pranojë futbollistët e Kosovës me himn e flamur, në rast se këto dy kombëtare ndeshen në kuadër të kualifikimeve. 

Federata spanjolle ka kërkuar të mënjanojë përballjen me Gjibraltarin, por këtë nuk e ka kërkuar edhe për Kosovën.  

Për kualifikimet e Evropianit të vitit 2020, shorti do të hidhet më 2 dhjetor në Dublin, derisa UEFA ka paraparë disa rregulla për kombëtaret, kush me kë mund të luajë dhe cilat kombëtare duhen evituar në grupe. 

Kosova nuk mund të luajë kundër Serbisë e Bosnjës, por me Spanjën po, në rast se bie në të njëjtin grup. Spanja mund të kishte qëndrim tjetër, pasi nuk e njeh Kosovën shtet, por vendimi i javëve më parë për të mos pranuar karateistët kosovarë me simbole shtetërore detyroi Komitetin Olimpik Ndërkombëtar të merrte një vendim të ashpër. 

Sipas KON-it, Federata Sportive Ndërkombëtare nuk mund të organizojë gara e turne, në rast se Spanja nuk garanton pjesëmarrje të barabartë për të gjithë sportistët.