Ka vrarë gruan dhe “bën përgjegjës” kanunin

I akuzuari ka përmendur kanunin, i cili "e ka detyruar të vriste gruan pasi që ajo ia kishte shkelur nderin dhe ia kishte marrë fytyrën”.

Prokuroria ka kërkuar 19 vjet burg për shqiptarin 46 vjeçar nga Kosova që ka mbytur bashkëshorten në St. Gallen. Vrasja ka ndodhur në dhjetor të vitit 2011, kur dorasi kishte shkelur gruan me veturë dhe pastaj kishte dalë dhe e kishte goditur me shufër hekuri, duke shkaktuar vdekjen e saj në vendine  ngjarjes.

Para trupit gjykues të St. Gallenit, kosovari është sjellë i lidhur me pranga të këmbëve. Pyetjeve të gjyqtarit u është përgjigjur në gjuhen shqipe dhe kryesisht duke e hequr fajin nga vetja. Siç raportojnë mediet zvicerane nga salla e gjyqit, i akuzuari pasi ka pranuar fajin, ka thënë se po kaq fajtore është edhe vetë ish gruaja e tij. Ajo, sipas tij, ka qenë fajtore për vdekjen e vet pasi që e ka braktisur atë duke shkuar të jetojë me një turk. Ai ka përmendur edhe kanunin, i cili e ka detyruar të vriste gruan pasi që ajo “ia kishte shkelur nderin dhe ia kishte marrë fytyrën”.

Prokurori ka bërë fjalë për “vrasje të paralajmëruar” pasi që, sipas tij, i akuzuari e ka kërcënuar në vazhdimësi bashkëshorten me vrasje, pasi që ajo ishte ndarë nga ai. Ai e ka planifikuar vrasjen në mënyrë të paskrupullt, pa i lënë asaj asnjë shans mbijetese”.

Prokurori ka kërkuar 19 vjet heqje lirie për dorasin që ka kryer veprën penale vrasje e rëndë.