Rexha i AKP-së jep dorëheqje

Dorëheqja e Rexhës pason largimin e përfaqësueses së SHBA-ve nga Agjencia Kosovare e Privatizimit. Dorëheqjen e tij a kanë konfirmuar njerëzit e partisë së tij

Agjencia Kosovare e Privatizimit duket se është bërë një “patate e nxehtë’ të cilën nuk po mundet askush ta mbaj në duar. Disa javë pasi që është emëruar drejtor i AKP-së, Blerim Rexha është detyruar, që të enjten të japë dorëheqje nga posti që e drejton.

Lajmi është konfirmuar për REL nga kryetari i Komisionit Parlamentar për zhvillim ekonomik, infrastrukturë, tregti dhe industri, Zenun Pajaziti. Komisioni i këtij të fundit mbikëqyr edhe punën e Agjencisë Kosovare të Privatizimit.

Dorëheqja e Rexhës pason largimin e përfaqësueses së Shteteve të Bashkuara nga Agjencia Kosovare e Privatizimit. Bernadette Roberts u largua nga bordi i drejtorëve të AKP-së, pasi që kishte vërejtje serioze në procesin e privatizimit.

“Zhvillimi i sektorit privat dhe privatizimi janë vendimtarë për rritjen ekonomike të Kosovës dhe krijimin e vendeve të punës”, kanë thënë përfaqësuesit e Ambasadës  Amerikane.

“Prandaj, është e domosdoshme që qeveria të angazhojë individë kompetentë dhe etikë për të zhvilluar një proces të drejtë dhe transparent të privatizimit nga i cili përfiton Kosova si e tërë dhe jo interesat individuale”, thuhet në përgjigjen e ambasadës së SHBA-ve në Prishtinë.

Largimi i përfaqësuesve amerikanë nga ky institucion, është cilësuar si lajm jo i mirë për Kosovën, si nga zyrtarët shtetërorë, ashtu edhe nga forcat politike në opozitë dhe shoqëria civile.

Bordi i AKP-së kryesohet nga Blerim Rexha, ndërsa anëtarët tjerë janë: Haxhi Arifi, Skender Komoni, Dardane Peja, Maja Milanoviq, Hubert Warsmann dhe Muhammed Omran.

Para se Rexha të vinte në krye të AKP-së, këtë institucion e ka drejtuar Dino Asanaj, i cili për shkaka të presioneve kishte bërë vetëvrasje me thikë. Kjo vrasje kishte tronditur Kosovën, ndërsa AKP-në e kishte bërër një institucion ku politika i ka rrënjët shumë të thekura.