S’ka marrëveshje, vazhdojnë konsultat

Zyra e baroneshës Ashton thotë se Thaçi dhe Daçiq kanë rënë dakord për një tekst të caktuar, për të cilin do të diskutojnë në qeveritë e tyre gjatë kësaj jave

Dy ditë takime intensive në Bruksel, nuk kanë qenë efektive, që dy kryeministrat, Hashim Thaçi i Kosovës dhe Ivica Daçiq i Serbisë, ta gjejnë një zgjidhje për zbatimin e marrëveshjes së 19 prillit. Megjithatë palët negociuese, siç thuhet, janë pajtuar parimisht për një plan zbatimi.

Pas takimit të së mërkurës, dy kryeministrat kanë mbetur që të diskutojnë me qeverinë në Prishtinë, respektivisht në Beograd, për pranimin ose jo të planit të zbatimit.

Edhe ky takim, sikurse takimet tjera ka kaluar pa detaje nga ndër,jetësuesja, baronesha britanike, Catherine Ashton. Zyra e kësaj të fundit ka deklaruar nëpërmjet një komunikate për media, se Thaçi dhe Daçiq kanë rënë dakord për një tekst të caktuar, për të cilin do të diskutojnë.

“Ata do të jenë në kontakt me mua deri në fund të javës”, ka thënë baronesha Ashton, raporton REL.

Kryeministri Thaçi ka thënë se bëhet fjalë për pajtueshmëri parimore dhe se fjalën kryesore do ta kenë qeveritë e të dyja vendeve. “Kemi arritur pajtueshmëri parimore sa i përket planit të implementimit”, ka deklaruar kryeministri kosovare.

“Ka mbetur që kjo pajtueshmëri të verifikohet në kuadër të Qeverive të Kosovës dhe të Serbisë. Në pajtueshmërinë parimore janë të përcaktuara periudhat kohore dhe aktorët implementues në gjashtëmujorin e ardhshëm”, ka thënë Thaçi.

Ngjashëm është shprehur edhe homologu i tij serb, Ivica Daçiq, i cili ka thënë se është arritur deri te një tekst, i cili përfshin planin e zbatimit të marrëveshjes së 19 prillit, por për të cilin do të deklarohen qeveritë e Serbisë dhe të Kosovës.

Plani përmban veprime dhe afate kohore, të cilat duhet të realizohen në muajt e ardhshëm”, ka thënë Daçiq. Marrëveshja e 19 prillit është e para ndërmjet Kosovës dhe Serbisë, e cila parasheh raporte normale mes dy shteteve, por zbatimi i saj ka ngecur.