Haradinaj: Qeveria e Kosovës do të mbështesë sportistët kosovarë

Kryeministri i Kosovës, Ramush Haradinaj, është takuar me Klubin e Hendbollit të Femrave-Istogu, i kryesuar nga trajneri Faruk Shala.

Gjatë takimit Haradinaj ka thënë se Kosova është krenare me vajzat dhe djemtë e saj, të cilët përmes sportit më së miri po e përfaqësojnë vendin tonë në arenën ndërkombëtare.

Me këtë rast, Haradinaj ka përgëzuar hendbollistet e Istogut për arritjet e tyre në të tetën e finales së “Challenge Cup”, duke u renditur në mesin e 16 ekipeve më të mira të Evropës, përcjell albinfo.ch.

“Sportistët kulmorë që i ka Kosova, duhet të jenë motiv dhe shembull për gjeneratat e reja, por edhe për hendbollistet e klubit “Istogu” për pjesëmarrje në garat ndërkombëtare”, tha kryeministri Haradinaj, duke theksuar se është për keqardhje që Klubi i Hendbollit të Femrave Istogu nuk gëzon kushte të mira për t’i zhvilluar aktivitetet e tyre.

Haradinaj tha se Qeveria e Kosovës do të jetë mbështetësja kryesore e të gjithë sportistëve kosovarë, të cilët me arritjet e tyre po bëjnë histori nëpër botë në gara të rëndësishme sportive.

Ndërkaq, trajneri i Klubit të Hendbollit të Femrave Istogu, Faruk Shala, e njoftoi atë me kërkesat që i ka Klubi Hendbollistik i Femrave “Istogu”, me theks të veçantë mungesën e një palestre, si dhe mbështetjen financiare për trajtime mjekësore, që janë baza kryesore e zhvillimit të aktiviteteve të tyre.