Macron- Thaçit: Në Paris u riafirmua angazhimi për paqen

Presidenti i Francës, Emmanuel Macron, i ka dërguar një letër presidentit Thaçi, përmes së cilës e ka falënderuar për pjesëmarrjen në ceremoninë e shënimit të 100 vjetorit të përfundimit të Luftës së Parë Botërore, të mbajtur në Paris, më 11 nëntor të këtij viti.

Në këtë letër dërguar presidentit Thaçi, presidenti Macron shkruan se kjo ceremoni ishte një mundësi për të riafirmuar angazhimin për paqen dhe gatishmërinë për forcimin e dialogut dhe veprimit kolektiv.

“Ajo na dha mundësi ne politikanëve, të vetëdijshëm siç jemi rreth mësimeve të së kaluarës dhe kompleksitetit të sfidave me të cilat përballemi, për të riafirmuar angazhimin për paqen dhe gatishmërinë për forcimin e dialogut dhe veprimit kolektiv”, shkruan presidenti Macron.

Tutje në letër thuhet se: “Ceremonia mundësoi nderimin me solemnitet dhe emocion të miliona viktimave të një tragjedie që shënjoi thellësisht kujtesën e popujve tanë dhe orientoi fatin e botës”.