Për 100 ditë, Serbia humbi 100 milionë euro nga taksat

Ilustrim

Taksa 100 për qind ndaj produkteve të Serbisë dhe Bosnjës po vazhdon në Kosovë. Nesër bëhen tre muaj prej kur është vendosur taksa ndaj mallrave serbe dhe boshnjake.

Më 6 nëntor 2018 kishte filluar të aplikohet taksa prej 10 për qind, ndërsa dy javë më pas e njëjta ishte ngritur në 100 për qind.

Për shkak të humbjeve të mëdha financiare, të cilat përgjatë kësaj periudhe vlerësohet se kanë arritur shumën prej rreth 100 milionë eurosh, është rritur edhe presioni ndërkombëtar ndaj kryeministrit kosovar, Ramush Haradinaj, për heqjen ose pezullimin e saj, me arsyetimin se ka bllokuar dialogun në Bruksel, shkruan Zëri.

Shtetet e Bashkuara të Amerikës (SHBA) dhe Bashkimi Evropian po kërkojnë urgjentisht heqjen e taksës, kërkesë kjo që po pranohet edhe nga partneri i madh i koalicionit qeverisës (PDK), ndonëse drejtuesit e koalicionit fillimisht merrnin merita për vendosjen e taksës 100 për qind, përcjell albinfo.ch.