Qeveria e Kosovës miratoi Strategjinë për Diasporën

Strategjia synon të ruaj identitetin kulturor dhe gjuhësorë, të shmangë asimilimin dhe ta ndihmojë integrimin e diasporës kosovare në vendet ku jetojnë

Qeveria e Kosovës ka miratuar të hënën Strategjinë për Diasporën dhe Mërgatën, nëpërmjet të së cilës, institucionet në Prishtinë synojnë që me veprime konkrete, të sigurojë avancimin e të drejtave politike e sociale për diasporën kosovare.

Strategjia gjithashtu synon të ruaj identitetin kulturor dhe gjuhësorë, të shmangë asimilimin dhe ta ndihmojë integrimin e diasporës kosovare në vendet ku jetojnë.

Objektivi i strategjisë, siç u tha në mbledhjen e rregullt të qeverisë, është edhe lehtësitë ligjore dhe administrative për ata që dëshirojnë ta ndihmojnë zhvillimin ekonomik të atdheut të tyre.

“Një nga synimet e strategjisë është edhe organizimi sa më i mirë i diasporës, duke e ndihmuar në rrjetëzimin e organizimeve të ndryshme të diasporës kosovare nëpër botë”, u tha në mbledhjen e qeverisë Thaçi, ku u diskutua edhe për takimin e nesërm në Bruksel me palën serbe dhe për zgjedhjet lokale.

Sa i përket zhurmës që është bërë për logon në fletëvotime, kryeministri Hashim Thaçi tha se delegacioni i Kosovës nuk e ka ndonjë mandat sa i përket kësaj çështje. Kjo çështje është e rregulluar me Kushtetutën dhe ligjet e Kosovës, dhe është në autoritetin e plotë të Komisionit Qendror Zgjedhor.

“Kështu që, kjo çështje nuk shtrohet për diskutim në Bruksel, dhe nuk është as në autoritetin e Qeverisë së Kosovës që të merr ndonjë vendim”, tha kryeministri Thaçi duke i lënë këtë çështje kompetencë KQZ-së.

Kryeministri Thaçi njoftoi kabinetin qeveritar se pas Brukselit Delegacioni i Kosovës do të udhëtojë për në Nju Jork, ku në Mbledhjen e Këshillit të Sigurimit, që do të zhvillohet të enjten do të prezantohet progresi i arritur i Kosovës në këta tre-katër muajt e fundit.