Trajneri fiton ‘Green Card’, jep dorëheqje nga Vllaznia

Klubi i futbollit Vllaznia nga Shkodra ka zyrtarizuar nëpërmjet një komunikate për shtyp largimin e trajnerit Hasan Likës, por arsyet e këtij të fundit janë krejtësisht të ndryshme nga të trajnerëve tjerë.

Në komunikatën e klubit shkodran theksohet se, Hasan Lika e la detyrën e tij pasi do të emigrojë drejt Shteteve të Bashkuara pas pak ditësh, së bashku me familjen e tij, shkruajnë mediat shqiptare.

Ai ka fituar ‘Green Card’ dhe ka kërkuar leje që të largohet drejt SHBA-së, përcjell albinfo.ch.

Klubi shkodran, duke parë ecurinë e mirë të skuadrës, që është pranë rikthimit në Superligën shqiptare, vendosi që të mos e pengojë trajnerin dhe e falënderoi për kontributin e dhënë prej tij.

Ndërkohë, klubi i Vllaznisë pritet të bëjë shumë shpejt publik emrin e trajnerit të ri, që do të marrë drejtimin e skuadrës deri në fund të sezonit.