Fillon rrugëtimi i Kosovës për Evropian

Ky është takimi i parë i Kosovës në kualifikimet për Kampionatin Evropian

Përfaqësuesja e Kosovës në futboll është përgatitur maksimalisht për ndeshjen ndaj Bullgarisë që do të zhvillohet sonte nga ora 20:45.

Përzgjedhësi Bernard Challandes në stërvitjen e fundit ka pasur në dispozicion të gjithë futbollistët duke përfshirë edhe Benjamin Kolollin. Atmosfera është jashtëzakonisht e mirë dhe të gjithë futbollistët janë optimistë për sukses, ndonëse janë të vetëdijshëm për përvojën e kundërshtarit në ndeshje të tilla, përcjell albinfo.ch.

“E kemi analizuar kundërshtarin. Në Ligën e Kombeve nuk kanë bërë shumë gola. Ne e pamë me Danimarkën se mund të bëjmë mirë dhe jemi optimistë se me mbështetjen e tifozëve mund t’ia dalim. Bullgaria është ekip ndryshe nga Danimarka, pasi janë fizikisht të fortë dhe kanë agresivitet”, ka thënë Hekuran Kryeziu.

Ndërkaq, përzgjedhësi Challandes e ka vlerësuar Bullgarinë si kundërshtar shumë të fortë. “Nëse luajmë mirë, kemi mundësi t’i marrim tri pikët, por duhet ta dimë se do të jetë ndeshje krejt ndryshe nga ajo me Danimarkën. Tani kemi para vetes një ndeshje kualifikuese dhe bullgarët janë shumë agresivë dhe kanë futbollistë me përvojë”, ka thënë Challandes.

---