Shqipëria u thotë “Jo” armëve kimike të Sirisë

Me respektin me të madh ndaj shqiptarëve ju them të gjithëve se “JO”, nuk do të përfshihemi në këtë operacion", kështu deklaruar kryeministri Edi Rama

Kryeministri i Shqipërisë, Edi Rama ka dhënë fjalën e fundit lidhur me armët kimike të Sirisë, duke kundërshtuar që arsenali i armeve të Bashar al Asadit të shkatërrohet në territorin e tij. Ai tha se Shqipëria nuk do të jetë poligon ia armeve kimike, sepse nuk ka kapacitete për t’i përballuar ato.

 

Me këtë qëndrim, kryeministri shqiptar i ka dhënë fund ankthit të mijëra shqiptarëve që prej disa ditësh kanë vazhduar të protestojnë kundër armëve kimike të Sirisë në Shqipëri.

 

“Me respektin me të madh ndaj shqiptarëve ju them të gjithëve se “JO”, nuk do të përfshihemi në këtë operacion”, kështu deklaruar kryeministri Edi Rama në një konferencë për medie.

 

Ai tha se kur u vu ne kontakt iu kërkua konfidencialitet, çka e detyroi të mos fliste publikisht për diskutimet që po zhvilloheshin në kuadër të asgjësimit të arsenalit kimik të Sirisë. Kryeministri garantoi se nuk do e tradhtonte kurrë popullin e tij, raporton BW.

 

Kryeministri Rama tha se oferta për shkatërrimin e armëve kimike, do të ndihmojë që të gjitha zonat e mëhershme të kontaminuara të pastrohen, duke mos lejuar që asnjë gram të mbetet në Shqipëri! Ai ka akuzuar opozitën për instrumentalizimin e gjendjes dhe propagandën histerike të saj.

 

Rama ka theksuar se “pa Shtetet e Bashkuara të Amerikës (SHBA), shqiptarët dhe Shqipëria nuk do të ishin në këtë gjendje ku janë sot”. Ai ka thënë se është i pakuptueshëm “antiamerikanizmi” i cili është trumbetuar gjatë këtyre ditëve.

 

“SHBA-të nuk vrasin njerëz, por njerëzit e SHBA-ve janë në frontet e luftës për të mirën e njerëzimit”, ka thënë Rama.

 

Menjëherë pas këtij vendimi ka reaguar Ambasada e Shteteve të Bashkuara të a Amerikës në Shqipëri.

 

“E respektojmë vendimin e kryeministrit. Shtetet e Bashkuara e vlerësojnë faktin që Qeveria e Shqipërisë e shqyrtoi seriozisht mbështetjen e përpjekjes ndërkombëtare për të eliminuar materialet luftarake kimike të Sirisë në mënyrë të sigurt”, thuhet në reagimin e Ambasadës në Tiranë.

 

Pas këtij qëndrimi, siç thuhet, nuk ndryshon qëndrimi i Shteteve të Bashkuara për Shqipërinë.

 

“SHBA ka një miqësi të fortë dhe jetëgjatë me Shqipërinë, prandaj do të vazhdojnë të mbështesë qeverinë dhe popullin e Shqipërisë teksa punojnë për të ndërtuar një shoqëri më të drejtë dhe më demokratike:, thuhet në deklaratë.

 

Shtetet e Bashkuara, siç thuhet, do të vazhdojnë të punojnë me aleatët dhe partnerët si dhe me ONAK dhe Kombet e Bashkuara për të siguruar eliminimin e programit të armëve kimike të Sirisë.

 

“Mbetemi besimplotë se do ta përfundojmë eliminimin e programit brenda afatit për të cilin është rënë dakord”, thuhet në deklaratë, të cilës i referohen mediet në Tiranë.

 

---