Kosovë, fillon fushata e balotazhit

Fushata e balotazhit do të zgjasë pesë ditë. Zgjedhjet mbahen të dielën më 1 dhjetor. Gara zhvillohet në 24 komuna, ndërsa Zveçani shkon në rivotim

Pas një heshtje tri javore, partitë politike në Kosovë kanë filluar të hënën fushatën e balotazhit në 24 komuna, ku në raundin e parë nuk u përcaktua fituesi. Fushata do të zgjasë pesë ditë, ndërsa zgjedhjet për balotazh do të mbahen të dielën më 1 dhjetor. Deri më 29 nëntor, sa do të zgjatë fushata, pritet të zhvillohet garë e fuqishme kryesisht ndërmjet kandidatëve të partive rivale, PDK-së dhe LDK-së. Kandidatët e këtyre partive garojnë në Gjilan e Prizren, Dragash, Lipjan, Ferizaj etj.

Po ashtu interesant balotazhin e bën edhe gara për Prishtinën, ku lideri i LDK-së, Isa Mustafa do të garojë kundër kandidatit të Vetëvendosjes, Shpend Ahmeti. Ky i fundit ka arritur të fitojë dukshëm në zgjedhjet e para, prandaj shumëkush e ka parë si fitues moral edhe pse gjasat i ka të vogla për të sfiduar liderin e opozitës. Ndërsa gara interesante do të zhvillohet edhe në komunat e Rrafshit të Dukagjinit, në Pejë e Gjakovë, ku kandidatët e AAK-së, do të garojnë kundër LDK-së përkatësisht AKR-së.

Në balotazh shkon edhe Lipjani, Malisheva, Mitrovica e Veriut, Klina, Kamenica, Mitrovica, Novobërda, Obiliqi, Rahoveci, Shtërpca, Suhareka, Vitia, Vushtrria, Juniku, Graçanica, Parteshi, Ranillug, Kllokoti. Po këtë datë, Komisioni Qendror i Zgjedhjeve ka vendosur që të përsëriten votimet në tri vendvotime në Komunën e Zveçanit dhe pastaj të shpallet edhe kandidati fitues.

Kurse komunat të cilat kanë pasur fitues në raundin e parë dhe që nuk do të ketë zgjedhje janë Deçani, Skenderaj, Gllogoci, Podujeva, Shtimja, Kaçaniku, Hani i Elezit, Fushë-Kosova, Istogu dhe Mamusha. Interesant në garën e parë ka bërë kandidati i pavarur, Rufki Suma i cili për të dytën herë fiton në Han të Elezit, në raundin e parë.