“Java e Biznesit Kosovar 2013” në shenjë të prodhimeve vendore

Ky projekt tradicional ka për qëllim të sensibilizojë qytetarët e Kosovës të konsumojnë prodhime vendore

Ka përfunduar “Java e Biznesit Kosovar 2013” e mbajtur në Pejë e cila ka prezantuar prodhimet vendore, me moton “Unë konsumoj prodhime vendore, po ju”.

Ky projekt tradicional ka për qëllim të sensibilizojë qytetarët e Kosovës të konsumojnë prodhime vendore.

“Kjo është ndihmesa më e madhe që mund t`i bëjë dikush prodhuesve vendës dhe krahas konsumimit të prodhimeve kosovare, rritet edhe zhvillimi ekonomik, mirëqenia qytetare dhe eksporti drejt vendeve tjera”, ka thënë kryetari i Aleancës Kosovare të Bizneseve, Agim Shahini.

Shahini me ketë rast u ka kërkuar institucioneve që prodhuesit e Kosovës, ti kenë prioritet dhe të bëjnë politika më të favorshme për zhvillimin e biznesit dhe rritjen ekonomike.

“Tashmë prodhimet kosovare janë të pranishme në shumë vende të ndryshme dhe eksporti duhet të rritet edhe më shumë, sepse prodhimet e Kosovës janë të cilësisë së lartë dhe qytetarët duhet ti konsumojnë”, tha Shahini

Ndërkohë, drejtori i Zhvillimit Ekonomik në Komunën e Pejës, Sokol Ukaj, tha se komuna po mundohet të bëjë përmirësimin e mjedisit afarist në Komunën e Pejës dhe krijimit të lehtësirave për biznesin.

“Si institucione komunale bashkërisht me bizneset kemi krijuar raporte të mira në mënyrë që ata të jenë më zhvilluar”, tha Ukaj.

Karavani “Javët e Biznesit Kosovar 2013” meë29 nëntor vazhdon në Mitrovicë dhe do të vazhdojë gjatë javëve në vijim nëpër tërë Kosovën e më gjerë deri më 26 dhjetor 2013.