Kosovë: Kthehet në vendin ku u dhunua 20 vjet më parë

Gruaja e parë që ka folur publikisht për dhunimin e saj nga forcat serbe gjatë luftës, Vasfije Krasniqi-Godman, është kthyer në vendin ku ndodhi dhunimi, me porosinë e qartë që të gjitha gratë e dhunuara në Kosovë të dalin e të flasin në mënyrë që të dënohen ata që kryen krime.

“Ky krim nuk do të fshehet më, se 20 vjet u bën boll, krimet ndodhën edhe para familjes, para burrit e fëmijëve, ne po ua mbulojmë serbëve duke e mbajtur në vete, i lus familjarëve të flasin lirshëm, ata që janë të dhunuar të kenë mbrojtje të familjes e institucioneve e të kërkojmë drejtësi, na duhet, sepse shpirtit nuk do të rehatohet deri sa ta kemi drejtësinë”, deklaroi ajo. 

Në përkrahje të grave të dhunuara u mblodhën disa qytetarë, të cilët kërkuan drejtësi.

Drejtoresha ekzekutive në QKRMT, Feride Rushiti, e cilësoi Krasniqin si një ambasadore të guximshme.

Rushiti pohoi se Kosova nuk ka ditë të veçantë ku shënohet krimi më i heshtur, ai i dhunimeve seksuale gjatë luftës së fundit.