Swatch me fitim rekord, 1.93 miliard franga

Qarkullimi që ndërmarrja me seli në qytetin Biel/Bienne ka realizuar gjatë vitit të kaluar është rritur për 8.3 për qind duke arritur në 8.8 miliardë franga

Koncerni zviceran Swatch, më i madhi i industrisë së orëve në botë gjatë vitit 2013 ka realizuar një fitim prej 1.93 miliard frangash, që është për 20 për qind më shumë se një vit më parë. Qarkullimi që ndërmarrja me seli në qytetin Biel/Bienne ka realizuar gjatë vitit të kaluar është rritur për 8.3 për qind duke arritur në 8.8 miliardë franga.

Me rezultatet e mira të arritura në vitin 2013, Swatch, ashtu si dhe industria e orëve në përgjithësi ka vazhduar trendi i sukseseve i filluar prej katër vitesh në këtë degë industriale në Zvicër, thuhet në një njoftim për medie. Në këtë kontekst, në Swatch dhe në industrinë e orëve besojnë se edhe viti 2014 do të jetë një vazhdimësi e sukseseve.

Swatch si kompani me shtrirje globale gjatë vitit të kaluar e ka rritur numrin e të punësuarve për 3800 të rinj, duke mbërritur në shifrën e gjithëmbarshme prej 34 mijë punëtorësh. Vetëm në Zvicër janë hapur 900 vende të reja të punës.