Dy iniciativa nën hijen e asaj “Kundër Migracionit Masiv”

Në nivel nacional sot votohet edhe për iniciativën e quajtur FABI mbi infrastrukturën hekurudhore dhe atë për financimin ose jo nga shteti të abortit

Sot në Zvicër, qytetarët me të drejtë vote do të votojnë për tri iniciativa të ndryshme në nivel vendi dhe për shumë të tjera në nivel kantonesh e komunash. Po ashtu ne këtë të diele votimesh, në disa komuna bëhet edhe zgjedhja e asambleve komunale.

Votimi për iniciativën e SVP/UDC-së “Kundër migrimit masiv” ka vënë nën hije votimet tjera për faktin se nga ai varen raportet e Zvicrës me vendet e BE-së. Ai në fakt konsiderohet si njeri ndër votimet më me peshë që ka bërë Zvicra viteve të fundit dhe fitorja e tij eventuale do të shkaktonte tronditje të vërtetë në Zvicër dhe më gjerë.

Në nivel nacional sot votohet edhe për iniciativën e quajtur FABI mbi infrastrukturën hekurudhore dhe atë për financimin ose jo nga shteti të abortit.

Te FABI çështja që shtrohet është: si do të financohet në të ardhmen infrastruktura shumë e ngarkuar hekurudhore. Këshilli Federal dhe parlamenti propozojnë që operimi, mirëmbajtja dhe zgjerimi i rrjetit hekurudhor në të ardhjen të financohet nga një fond i përbashkët për infrastrukturën. Me atë rast federata do të duhej të shtonte financimin nga 4 në 5 miliardë franga në vit. Por, kundër FABI janë Bashkësia e makinave komerciale ASTAG, ajo e Importuesve të Automobilave  “Autoschweiz” dhe SVP/UDC. Ato kundërshtojnë që ngasësit e automjeteve të bashkëfinancojnë hekurudhën përmes tatimeve të tyre që japin për rrugët.

Sot po ashtu në Zvicër do të votohet edhe nisma “Financimi i abortit është çështje private”. Ajo kërkon që abortet të mos mbulohen nga sigurimi bazë shëndetësor.

Iniciatorët argumentojnë se sigurimi bazë do të lirohet me një normë vjetore prej 8 deri 20 milionë frangash zvicerane nëse abortet duhet të paguhen privatisht.

Qeveria e vendit, duke kundërshtuar iniciativën shprehet se dëshiron që edhe në të ardhmen “kriteret morale, religjioze ose sociale e etike dhe jo ato financiare të jenë vendimtare në rastet e vendimit për abortim”.

Po kështu qeveria nuk dëshiron të ndryshohet rregullimi aktual i kësaj çështjeje, i cili në vitin 2002 qe miratuar në mënyrë të qartë me referendum nga populli.

Synim i vendimit të marrë atëherë që përcaktonte afatin e lejimit të abortit ka qenë që të harmonizohen ligji dhe realiteti.

Albinfo.ch do të informojë lexuesit e saj nga ora në orë për rezultatet, reagimet dhe opinionet lidhur me votimet që mbahen sot.