Kosova, punë edhe për të huajt

Sipas ekspertëve të ekonomisë, në Kosovë ka kërkesa për “zejtar” deficitar nga fushat e ndërtimit dhe motoristikës

Edhe pse Kosova shënon shifrat rekord për numrin e të papunëve me mbi 30 për qind, në tregun vendor ka kërkesa për punësimin e shtetasve të huaj në profesione të ndryshme. Sipas ekspertëve të ekonomisë, Kosova ka nevojë “zejtar” deficitar nga fushat e ndërtimit dhe motoristikës.  

Kështu thuhet në një hulumtim të kuotës së punësimit për sivjet, të përgatitur nga Aleanca Kosovare e Biznesit. Kryetari i AKB-së, Agim Shahini, ka thënë se dy sektorët me më se shumti kërkesa janë ndërtimtaria dhe transporti e komunikacioni, si dhe sektori i arsimit.

“Investimet në sektorin e ndërtimtarisë dhe transportit e komunikacionit kanë treguar edhe rritjen më të madhe të kërkesave për punësim”, citon “Tribuna” Agim Shahini.

Sipas hulumtimit, numri më i madh i kërkesave janë të profesionit të operatorëve apo montuesve të pajisjeve me 279 kërkesa, pasuar nga inxhinierët e ndërtimtarisë, elektroteknikës, mekanikës. Po ashtu ka nevojë edhe për mësimdhënës të disa lëmive.

“Kjo kuotë për secilin profesion në secilin sektor do të shërbejë si kuotë përfundimtare dhe do të vlejë për të gjitha kërkesat që vijnë për punësimin e të huajve të cilët kanë qëllim punësimin në Kosovë”, tha kryetari i Aleancës Kosovare të Bizneseve.

Ndryshe, Kosova ka numër shumë të madh të të papunëve, por shumica që presin një vend pune janë të pakualifikuar. Ndërsa ata që kanë kualifikime superiore, kanë gjetur një end pune, ose ka vite që kanë braktisur vendin, në kërkim të ndonjë jete më të mirë.