Qeveria, kundër caktimit të pagës minimale

Ammann: Caktimi i shumës prej 4000 frangash në muaj si pagë minimale do të vinte në rrezik funksionimin e mirë të tregut të punës në vend

Fushata për iniciativën e pagës minimale, e cila do të jetë objekt i një referendumi popullor në Zvicër, tashmë ka filluar. Ministri i ekonomisë, Johann Schneider-Ammann me një deklaratë të tij ka bërë të ditur qëndrimin negativ që qeveria ka ndaj kësaj iniciative. Një “po” për caktimin e pagës minimale, do të rrezikonte vendet e punës në Zvicër, ka thënë ai.

Sipas ministrit, caktimi i shumës prej 22 frangash në orë ose 4000 frangash në muaj si pagë minimale, ashtu siç e kërkon iniciativa do të vinte në rrezik funksionimin e mirë të tregut të punës në vend. Me një pagë të tillë Zvicra sigurisht do të ishte në krye të listës në botë, por kjo do të dobësonte aftësinë e saj konkurruese, ka thënë Ammann.

Me iniciativën që mban emërtimin zyrtar “Për mbrojtjen e pagave korrekte”, Federata e Sindikatave të Zvicrës (SGB) kërkon caktimin me anë të ligjit të një page minimale, të vlefshme në gjithë vendin. (albinfo.ch&sda).