Edhe një viktimë nga Gripi i Derrit

Viktima është një grua shtatzënë e cila në Qendrën Klinike ishte sjellë me emboli të mushkrive, ndërsa ishte konfirmuar me virusin H1N1. Kjo është viktima e tretë nga ky grip

Infektologët kosovarë nga Klinika e Infektives në Prishtinë njoftojnë edhe për një person të vdekur si pasoj e Gripit të Derrit. Viktima është një grua shtatzënë e cila në Qendrën Klinike Universitare të Kosovës ishte sjellë me emboli të mushkrive, ndërsa ishte konfirmuar edhe me virusin A1N1. 

Kjo viktimë shënon rastin e tretë të vdekjeve nga virusi H1N1, apo siç njihet në opinion si gripi i derrit.

“Kemi viktimën e tretë, ishte një grua e cila kishte emboli me mushkëri, por edhe e prekur nga gripi. Ka qenë shtatzënë”, konfirmon për REL drejtori i Klinikës Infektive Shemsedin Dreshaj. Viktima ka vdekur të enjten mbrëma, ndërsa ishte në muajin e shtatë të shtatzënisë.

Nga  fillimi i këtij viti, janë rreth 40 persona janë infektuar me virusin H1N1.

Ndryshe, sipas ekspertëve shëndetësor, një ditë më parë ka vdekur edhe një person tjerë nga gripi i derrit. Viktima ishte një mashkull i lindur më 1965 në komunën e Rahovecit.

Pacienti S. H  ishte në gjendje të rëndë shëndetësore në respirator dhe ka përfunduar me vdekje.

Ndryshe, gripi, i ashtuquajtur, i derrit (Swine Flu), është një sëmundje që atakon sistemin respirator dhe e shkakton virusi i tipit A (H1N1) që origjinën e ka nga derrat. Simptomat te gripi i derrit janë pothuajse të njëjta ose shumë të ngjashme me ato të gripit të zakonshëm (sezonal).

Simptomat e gripit të derrit janë: temperatura, ftohje, dhimbje të kokës, dhimbje të muskujve, humbje të apetitit, molisje (lodhje ekstreme), skuqje dhe djegie e syve, zënie dhe shkuarje hundësh, kollë e thatë, dhembje gryke (fyti), ndërsa te disa raste lajmërohen edhe marramendja, vjellje dhe diarreja.