Thaçi, mirënjohës për ndihmën zvicerane

Kryeministri Thaçi e ka falënderuar presidentin e Zvicrës, Burkhalter për mbështetjen e shtetit zviceran për Kosovën në të gjitha periudhat

Presidenti i Konfederatës së Zvicrës, njëkohësisht kryesues i OSBE-se, Didier Burkhalter gjatë vizitën ë Prishtinë, ka takuar edhe kryeministrin Hashim Thaçi me të cilin ka biseduar për zhvillimet e gjithëmbarshme në Kosovë dhe rolin që Zvicra ka dhënë në demokratizmin e vendit.   

Sipas një komunikate për media, në takimin ndërmjet dy liderëve, është biseduar edhe për zhvillimet aktuale politike, për marrëdhëniet ndërshtetërore mes Kosovës dhe Zvicrës dhe për rolin dhe mbështetjen e Organizatës për Siguri dhe Bashkëpunim në Evropë, në demokratizimin e vendit.

Kryeministri Thaçi e ka falënderuar presidentin e Zvicrës, Burkhalter për mbështetjen e shtetit zviceran për Kosovën në të gjitha periudhat.

Gjatë takimit, siç thuhet më tej, kryeministri Thaçi, ka vlerësuar lartë rolin dhe kontributin e OSBE-së në Kosovë në demokratizimin e vendit, me theks të veçantë rolin në organizimin dhe fasilitimin e procesit zgjedhor, që nga periudha e pasluftës dhe në vazhdimësi.

Shefi i qeverisë kosovare ka theksuar përkushtimin e tij dhe të qeverisë që drejton në avancimin e mëtejmë të proceseve demokratike dhe zhvillimore në Kosovë.