Përfaqësuesit fetarë premtojnë mbështetje për të mbijetuarit e dhunës seksuale

Foto: Ruairi O'Connell (FB)

Përgjatë konferencës “Të gjithë së bashku nën një zë”, Bashkësia Islame e Kosovës dhe përfaqësues të komuniteteve të tjera fetare në Kosovë janë zotuar për të mbështetur të mbijetuarit e dhunës seksuale të lidhur me konflktin, përcjell albinfo.ch.

Këtë zotim e ka përshëndetur edhe ambasadori britanik në Kosovë, Ruari O’Connell, i cili tha se Kosova u bë model për botën me këtë veprim.

Ai po ashtu ka thënë se udhëheqësit fetarë, në këtë mënyrë, japin mesazh se viktimat nuk duhet të ndihen të turpëruara.

“Me deklaratën e sotme, Kosova i ka dhënë shembull krejt botës. Shpresoj se të tjerët do ta kopjojnë shembullin e Kosovës dhe do të bashkohen me deklaratën globale në mbështetje të të mbijetuarve, në Konferencën Ndërkombëtare në Mbretërinë e Bashkuar, në nëntor 2019”, ka shkruar O’Connell në Facebook.

Tutje, ai ka shkruar se çdo individ duhet të ofrojë mbështetje për këtë kategori që ende ndihen të stigmatizuar.

“Fakti se të mbijetuarët ende ndjejnë stigmatizim, tregon dështimin tonë. Është mirë që shoqëria ka treguar mbështetje për të mbijetuarit. Por ne duhet ta bëjmë këtë si individë. Si burrë, kjo është sfida ime për çdo burrë tjetër në Kosovë. Kur të shkoni në shtëpi sonte, bisedoni me familjen tuaj. Tregojini familjes se nuk i dini krejt çka u ka ndodhur, por sikur të ishin të mbijetuara të dhunës seksuale, ato do ta kishin gjithmonë mbështetjen tuaj”, ka shkruar O’Connell.