Aktivitet për integrimin përmes sportit

Në manifestimin me moton “Sporti flet në një gjuhë” pritet që si mysafire speciale të vijë edhe kryetarja e Gjakovës, Mimoza Kusari-Lila

Të dielën, më 22 qershor në Allschwill të Bazelit, në organizim të ABSM dhe FC Dardania mbahet manifestimi tradicional sportiv, kulturor dhe shoqëror me karakter të integrimit, me moton “Sporti flet në një gjuhë”. Në kuadër të këtij aktiviteti tërëditor do të zhvillohet një turnir futbolli ndërsa për fëmijë do të ketë edhe gara vrapimi në shtegun prej 100 metrash si dhe gara dhe lojëra të tjera.

Aktiviteti ka në fokus të tij integrimin e të huajve, në këtë rast të shqiptarëve po edhe të tjerëve, në rrethin ku jetojnë. Këtë vit, manifestimin tradicional e nderojnë me praninë e tyre edhe përfaqësues të qeverisë së qytetit dhe të kantonit të Bazelit ndërsa, siç na njofton kryetari i ABSM-së, Skënder Nikoliqi, mysafire speciale do të jetë kryetarja e qytetit të Gjakovës, Mimoza Kusari-Lila me një delegacion.

Kusari-Lila do të pritet edhe nga strukturat e larta qeveritare të kantonit dhe të qytetit të Bazelit.

Në këtë manifestim të karakterit të gjerë, gjatë gjithë ditës do të ketë lojëra sportive por edhe muzikë, gjegjësisht valle popullore nga Shkolla e Vallëzimit Shqiptar “Shota”.

Të rinjtë dashamirës të futbollit do të kenë rastin të takojnë futbollistë të superligës së Zvicrës të cilët do të jenë të pranishëm në këtë eveniment.

Në shërbim të atyre që vizitojnë aktivitetin do të jenë stendat me ushqime në skarë dhe me pije freskuese gjatë gjithë ditës.

Aktiviteti, përmes ndeshjeve të futbollit fillon në orë 9.00. Në orën 11.00 do të bëhet hapja zyrtare e tij nga organizatorët dhe ku do të flasin edhe politikanët e përmendur. Ndërsa pasdite, me fillim në orën 17.30 bëhet ndarja e çmimeve të fituesve të turnirit dhe përmbyllja e manifestimit.