Zvicra, 10 milionë franga për menaxhimin e burimeve ujore në Kosovë

Agjencia Zvicerane për Zhvillim dhe Bashkëpunim (SDC) ka filluar programin e ri shumëvjeçar, duke siguruar mbështetje të drejtpërdrejtë në përpjekjet e Kosovës për të futur qasje më të mira në menaxhimin e burimeve ujore në gjithë vendin, transmeton albinfo.ch.

Programi “Menaxhimi i Burimeve të Integruar të Ujërave në Kosovë” ka për qëllim të përcaktojë prioritetet e investimeve për të përmirësuar statusin ekologjik të burimeve ujore dhe për të siguruar menaxhim afatgjatë të ujit në dobi të qytetarëve dhe mjedisit të Kosovës.

Drejtor i Zyrës së Bashkëpunimit Zviceran në Kosovë, Patrick Etienne, ka deklaruar se është shumë i lumtur që Qeveria e Zvicrës dëshiron të mbetet partneri i besueshëm i Kosovës në përpjekjet për t’i mbrojtur burimet natyrore.
Ai theksoi se fondet e përgjithshme në dispozicion për këtë program të siguruar nga Qeveria e Zvicrës janë pothuajse 10 milionë franga dhe bazuar në rezultatet që do të arrihen gjatë pesë vjetëve të ardhshme, pritet të vazhdojë më tej për një periudhë deri në dymbëdhjetë vjet.

Gjatë viteve të ardhshme, ky program pritet të krijojë kushtet e domosdoshme për të përmbysur prirjet e degradimit në ekosistemin e ujit, të optimalizojë përdorimin e potencialit ekonomik të ujit dhe të zvogëlojë rreziqet që lidhen me ujërat, si përmbytjet dhe thatësirat.