Përmirësohet gjendja në kufi: s’ka pritje

Informacionet nga Policia e Kosovës tregojnë se në Merdare, në hyrje për në Kosovë, nuk ka pritje fare, ndërsa në dalje, pritjet po zgjasin vetëm 30-40 minuta

Foto nga arkiva

Policia e Kosovës njofton bashkatdhetarët dhe të gjithë qytetarët kosovarë, se në pikë-kalimet kufitare Merdare, Mutivodë dhe Dheu i Bardhë që lidhë Republikën e Kosovës me atë të Serbisë, sot është përmirësuar gjendja sa i përket krijimit të kolonave dhe pritjeve të gjata.

“Departamenti i Policisë Kufitare vazhdon punën me kapacitetet të shtuara të personelit policor dhe aplikimit të punës së kontrollit kufitar të përshpejtuar, me qëllim të evitimit të kolonave dhe pritjeve të gjata nga qytetarët, bashkatdhetarët tanë”, thuhet në njoftim.

Informacionet e mesditës tregojnë se në Merdare në hyrje për në Republikën e Kosovës nuk ka pritje fare, ndërsa në dalje, sipas Policisë së Kosovës, kolona është e shkurtër dhe pritjet momentale po zgjasin vetëm 30-40 minuta.

Ndërsa në dy pikë-kalimet tjera kufitare tek Dheu i Bardhë dhe Mutivodë, sipas të njëjtit njoftim, nuk ka pritje fare, as në hyrje e as në dalje përveç kohëzgjatjes 5-10 minuta sa zgjatë procedura normale e kalimit kufitar.

“Vlen të potencohet se nga ana e zyrtarëve policor të Policisë së Kosovës, puna vazhdon të kryhet normalisht me kapacitete dhe intensitet të shtuar dhe njëherit  sqarojmë se kolonat-pritjet e mëhershme ishin shkaktuar si rezultat i fluksit të madh të automjeteve dhe procedurave që aplikonte pala serbe gjatë plotësimit të dokumenteve-formularëve përkatës”, thuhet në njoftimin e Policisë.

Ndryshe, gjatë këtij ditëve të kaluar, kryesisht të enjten dhe të premten, pritjet për dalje nga Kosova kanë qenë 2 deri 3 orë. Kolonat janë shkaktuar kryesisht nga pala serbe, e cila i obligon qytetarët që kanë letërnjoftime të Kosovës që t’i plotësojnë disa dokumente për kalimin transit nëpër Serbi. Kjo procedurë ka shkaktuar tollovi.