Drejtuesit e G7-ës, afër një marrëveshjeje për të ndihmuar Amazonën

Udhëheqësit ndërkombëtarë që u mblodhën në samitin e G7 thuhet se janë afër një marrëveshjeje për të ndihmuar në luftimin e zjarreve në Amazonë.

Presidenti francez, Emmanuel Macron, tha dje se marrëveshja për ndihmë teknike dhe financiare ishte afër.

Drejtuesit nga SHBA, Japonia, Gjermania, Franca, Italia, Mbretëria e Bashkuar dhe Kanada vazhdojnë takimin e tyre në qytetin bregdetar të Biarritz gjatë ditës së sotme.

Ky takim vjen pas tensionit ndërkombëtar për zjarret që po ndodhin në Brazil.

Kritikët kanë akuzuar Presidentin e Brazilit, Jair Bolsonaro, për shkatërrimin e Amazonës përmes retorikës anti-mjedisore dhe mungesës së veprimeve për shkeljet e shpyllëzimit.

Ashpërsia e zjarreve dhe reagimi i qeverisë së tij, ka shkaktuar protesta globale.

Presidenti Macron javën e kaluar i përshkroi zjarret si një “krizë ndërkombëtare” dhe nxiti që ato të jepeshin përparësi në samitin e G7 fundjavën që shkoi, shkruan BBC, përcjell Albinfo.ch.

Dje ai tha se “të gjithë janë dakord për të ndihmuar ato vende që janë goditur nga zjarret sa më shpejt që të jetë e mundur”.

“Ekipet tona po mbajnë kontakte me të gjitha vendet e Amazonës, kështu që ne mund të përfundojmë disa angazhime shumë konkrete që përfshijnë burime teknike dhe fonde.”

Kryeministri i Mbretërisë së Bashkuar, Boris Johnson, tha se Britania do të sigurojë 10 milionë dollarë për të mbrojtur Amazonën.