Vala e të nxehtit detyron kufizimin e prodhimit në centralet bërthamore franceze

Centralet bërthamore përdorin ujin e lumenjve për ftohjen e reaktorëve

Temperaturat rekord që kanë përfshirë Evropën Perëndimore po ndikojnë edhe në prodhimin e energjisë elektrike në Francë. Për shkak të rritjes së temperaturës së lumenjve, disa reaktorë të centraleve bërthamore janë detyruar të ulin prodhimin ose të ndërpresin përkohësisht punën për të mbrojtur ekosistemet ujore.

Centralet bërthamore përdorin ujin e lumenjve për ftohjen e reaktorëve. Kur temperaturat e ujit rriten përtej kufijve të lejuar, operatori francez EDF duhet të reduktojë prodhimin ose të ndalojë funksionimin e disa njësive, në mënyrë që uji i rikthyer në lumenj të mos dëmtojë florën dhe faunën, transmeton albinfo.ch.

Sipas të dhënave të EDF, prodhimi i energjisë bërthamore është ulur me rreth 4.1 gigavat, ose afërsisht 7% e kërkesës totale për energji në Francë. Kufizimet kanë prekur disa centrale, ndërsa temperaturat në disa rajone kanë kaluar 40 gradë Celsius.

Megjithatë, operatori i rrjetit elektrik francez ka bërë të ditur se vendi vazhdon të ketë kapacitet të mjaftueshëm për të përmbushur kërkesën për energji, pavarësisht ndërprerjeve të përkohshme në disa centrale.

Vala e të nxehtit që ka përfshirë pjesën më të madhe të Evropës ka shkaktuar probleme të shumta, nga ndërprerje në transport e deri te rritja e konsumit të energjisë, ndërsa ekspertët paralajmërojnë se fenomene të tilla pritet të bëhen më të shpeshta për shkak të ndryshimeve klimatike.

---