Shpërblehen për efiçiencë të energjisë

Tri biznese dhe tre individë janë shpërblyer nga EBRD për investimet në efiçiencë të energjisë, në kuadër të projektit KoSEP

Banka Evropiane për Zhvillim dhe Rindërtim (EBRD) ka shpërblyer të mërkurën, tri biznese dhe tre individë kosovarë që kanë investuar në efiçiencë të energjisë, në kuadër të projektit KoSEP, i cili është përkrahur nga Bashkimi Evropian dhe Qeveria e Norvegjisë.

Në një ceremoni mbajtur në Prishtinë, prodhuesi i radiatorëve dhe kaldajave efiçente “Jugoterm”, përpunuesi i mishit “Apetit” dhe kompania bujqësore “IliriD”, kanë marrë shpërblimet për investimet më të mira në sektorin e biznesit për investimet e tyre.

Ndërsa në sektorin e investimeve në ndërtesa banimi projektet më të mira janë shpallur ato të Sali Cacaj, Fadil Hoxha dhe Gjylba Debogaj të cilët i kanë kthyer shtëpitë e tyre në ndërtesa efiçiente.

Siç thuhet në një komunikatë për media, projekti KoSEP ka ndihmuar dhënien e mbi 5 milionë euro kredive dhe mbi 600 mijë euro grante, që kanë rezultuar me kursimin e mbi 8000 Megavat/orë (MGwh) të energjisë elektrike në vit.

“Kreditë në kuadër të projektit të cilat janë përkrahur me grante prej deri 20 për qind të shumës së kredisë janë distribuuar nga banka TEB, AFK (Agjencia për Financim në Kosovë) dhe KRK (Kreditimi Rural i Kosovës). Projekti do të vazhdojë deri në mars të vitit të ardhshëm”, thuhet në komunikatën për media. 

EBRD ka lansuar projektin e vet KoSEP, në tetor të vitit 2013, si përgjigje ndaj kërkesave në rritje të financimit të efiçiencës së energjisë. Siç thuhet, fondi prej 12 milionëve u huazon Institucioneve Partnere Financiare, të cilat pastaj japin kredi për individë dhe biznese.