Tifozët djegin flamurin shqiptar në Beograd

Në ndeshjen derbi të Serbisë, Partizan-Cervena Zvezda, simpatizantët e ty ekipeve dogjën flamurin kombëtar shqiptar dhe vazhduan me thirrje anti shqiptare

Stadiumet e futbollit në Ballkan vazhdojnë të mbesin arenat ku qytetarët i shfryen   urrejtjet ksenofobe. Edhe mbrëmë në stadiumin e Partizanit në Beograd, në ndeshjen derbi të Serbisë, Partizan-Cervena Zvezda, simpatizantët e ty ekipeve dogjën flamurin kombëtar shqiptar dhe vazhduan me thirrje anti shqiptare.

Madje në tribunat e stadiumit u shpalosen transparente “Kosovo je Srbija” (Kosova është Serbi). Ndërsa në 10- minutën e fundit të takimit dogjën dhe flamurin shqiptar. Gjatë takimit, ashtu siç pritej, janë shënuar edhe incidente.

Raportohet se ndeshja është ndërprerë për disa minuta pasi tifozët e të dy ekipeve “Delije” dhe “Grobari” kanë ndezur fishekzjarrë. Ndeshja përfundoi me rezultatin 1-0, për skuadrën vendase të Partizanit.

Gjatë gjithë natës së mbrëmshme forca të mëdha të policisë serbe kanë mbajtur të rrethuar Ambasadën e Shqipërisë në Beograd, pasi që kishte zëra se tifozët e dy skuadrave pas ndeshjes, do ta djegin këtë ambasadë. Urrejtja ndaj shqiptarëve në Serbi është rritur, pas ndeshjes së dhunshme Serbi-Shqipëri e cila u ndërpre në minutën 42.