Në skenarin më të mirë, vizat hiqen më 2016

Procesi i liberalizimit të vizave po ecë shumë ngadalë, prandaj viti 2016 do të jetë në skenarin më të mirë për heqjen e vizave nga BE, konsiderojnë ekspertët e integrimit

Heqja e vizave për kosovarët në vitin 2016, do të jetë varianti më i pranueshëm në këto rrethana, vlerësojnë përfaqësuesit e shoqërisë civile në Kosovë. Korrupsioni, krimi i organizuar dhe sundimi i ligjit, përfshirë këtu edhe krizën politike, e bëjnë gati të pamundur që vizat të hiqen në vitin 2015.   

Kështu u tha në një konferencë për media nga institutit “KIPRED”, ku u prezantua barometri për Sundimin e Ligjit në kuadër të projektit “Përmbushja e kërkesave të BE-së për qeverisje të mirë, për integrimin e mëtejshëm Evropian të Kosovës”.

Ariana Qosaj-Mustafa, hulumtuese në këtë institut, tha se korrupsioni dhe krimi, mbesin ndër sfidat më të mëdha. Edhe pse ka iniciativa, sipas saj, problemi qëndron tek aspekti i vullnetit politik, i cili përveçse është deklarativ, nuk ka interesim në disa sfera, që institucionet të veprojnë drejtpërdrejtë.

“Nëse do të kishim institucione të forta që do ta luftonin krimin e organizuar dhe korrupsionin, atëherë radha do të iu vinte edhe njerëzve që janë në qeverisjen e tanishme, apo ata që janë në një elitë politike me të përfaqësuar në Kosovë”, tha Mustafa, sipas të cilës, procesi i liberalizimit të vizave po ecë shumë ngadalëtë.

“Viti 2016 do të jetë në skenarin më të mirë, viti që ne mund të presim diçka më reale, në aspektin e liberalizimit të vizave. Edhe pse ka plotësime të shumta të kritereve, prapë mbesin shumë sfida dhe në zbatim të ligjeve dhe në praktikë por dhe me ndërtim të institucioneve, pavarësinë e tyre”, deklaroi ajo, citon Kpress.

Ndërkaq, Veton Mujaj, drejtor ekzekutiv i organizatës “Syri Vizionit”, tha se objektivat e këtij projekti kanë të bëjnë kryesisht me përfshirjen e kërkesave të BE-së, për qeverisje të mirë dhe integrimin e mëtutjeshëm evropian të Kosovës.

Ky barometër për herë të parë është vënë sot në funksion dhe i cili ka përfshirë periudhën e hulumtimit korrik-tetor 2014. Ndryshe, Kosova është vendi i vetëm në rajon ndaj të cilit BE aplikon sistemin e vizave.