Zgjedhjet në Kosovë, ja sa prokurorë dhe gjyqtarë janë angazhuar për to

Foto Ilustrim

Zyra e Prokurorit të Shtetit ka njoftuar se në ditën e zgjedhjeve do të jenë të angazhuar 100 prokurorë në nivel vendi. Këtë e ka konfirmuar Laura Pula, koordinatore nacionale e projektit “Mbrojtja e Votës”, përcjell albinfo.ch.

Edhe drejtori i operacioneve në Policinë e Kosovës, Afrim Ahmeti, ka thënë se policia do të caktojë ekipe monitoruese në të gjitha komunat e Kosovës, në mënyrë që të ofrohet siguri në të gjitha vendvotimet derisa të dorëzohen kutitë e votimit në Qendrën e Numërimit.

Kurse, Fatime Dërmaku, koordinatore e Këshillit Gjyqësor, ka thënë se ky Këshill ka caktuar 15 gjyqtarë.

Institucionet e rendit dhe ligjit janë mbështetur për angazhimet e tyre edhe nga përfaqësuesi i Ambasadës së Shteteve të Bashkuara të Amerikës në Prishtinë, John Bush, i cili ka thënë se SHBA-ja vazhdon t’i mbështesë zgjedhjet dhe se i inkurajon të gjithë që t’i raportojnë parregullsitë eventuale.

Fushata për zgjedhjet e parakohshme parlamentare në Kosovë ka nisur më 25 shtator dhe do të zgjasë dhjetë ditë.