Ministria e Diasporës rekomandon mërgimtarët: vendosni zinxhirët

MeD i njofton bashkatdhetarët se nëpër pikat kufitare të Hanit të Elezit, Dheut të Bardhë apo Merdares, rrugët janë të kalueshme, por kërkohen pajisje dimërore

Ministria e Diasporës i porosit të gjitha bashkatdhetarët, të cilët do të udhëtojnë për në Kosovë, nëpër pikat kufitare të Hanit të Elezit, Dheut të Bardhë apo Merdares, të jenë të pajisur me goma të dimrit dhe me zinxhirë, për shkak të reshjeve të mëdha të borës që kanë përfshirë Kosovën dhe rajonin.

Ministria e Diasporës, gjithashtu i informon të gjithë mërgimtarët që do të udhëtojnë për në Kosovë, në ditët e ardhshme, se rrugët magjistrale dhe ato rajonale janë të kalueshme, edhe pse me vështirësi, për shkak të shtresës së borës që nëpër zona të caktuara arrin deri në 10 cm, si dhe shtresës së akullit.

“Sipas informatave nga Policia e Kosovës, rrugët nga kalimi kufitar i Hanit të Elezit, Dheu i Bardhë dhe Merdare janë të kalueshme vetëm me pajisje dimërore (zinxhirë apo goma të dimrit), ndërkohë udhëzohen ngasësit që të kenë kujdes të shtuar për shkak të rrugëve të rrëshqitshme”, thuhet në deklaratën e Ministrisë së Diasporës.

Deri të hënën në mbrëmje, komunikacioni është zhvilluar pa ndërprerje nga të gjitha kalimet kufitare.