Turqia ndalon ofensivën në Siri, sipas kërkesës së SHBA-së

Ilustrim

Duket se Shtetet e Bashkuara dhe Turqia janë pajtuar që të pezullohet ofensiva turke në veri të Sirisë.

Nënpresidenti amerikan, Mike Pence, ka bërë të ditur se marrëveshja u arrit pas pesë orë bisedimesh me presidentin turk, Reccep Tayyp Erdogan, në Ankara.

“Turqia është pajtuar që të pezullojë operacionin për 120 orë, në mënyrë që lejojë tërheqjen e forcave kurde”, deklaroi Pence.

Po ashtu Pence tha se Shtetet e Bashkuara janë duke punuar me forcat kurde për tërheqje nga zona kufitare.

Sipas tij, Turqia dhe SHBA-ja janë pajtuar për “qëllimin e përbashkët për të shkatërruar grupin militant Shteti Islamik”.

Të dyja vendet janë pajtuar për një rezolutë paqësore për zonën e sigurt në veri të Sirisë, u shpreh nënpresidenti Pence.

Meqenëse krijimi i kësaj zone ka qenë edhe arsyetimi i Turqisë kur e filloi nëntë ditë më parë ofensivën në veri të Sirisë, Ankaraja tha se synon t’i dëbojë luftëtarët kurdë në atë rajon, të cilët i konsideron si terroristë dhe të mundësojë kthimin e miliona refugjatëve sirianë që gjenden në territorin turk, shkruan REL.

Përmes një postimi në rrjetin social Twitter, ai ka falënderuar presidentin e Turqisë, Reccep Tayyip Erdogan, duke thënë se miliona jetë janë shpëtuar.

“Lajme të shkëlqyera nga Turqia. Faleminderit president Erdogan. Miliona jetë do të shpëtohen!”, ka shkruar Trump, përcjell albinfo.ch.