1670 fëmijë po marrin kujdes psiko-social pas tërmetit në Shqipëri

1670 fëmijë po marrin kujdesin e duhur psiko-social në hotele dhe pikat e emergjencës, me shpresën për të lënë pas sa më parë pasojat e tërmetit.

Nën koordinimin e Ministrisë së Shëndetësisë dhe Mbrojtjes Sociale, nëpërmjet Agjencisë për Mbrojtjen e Fëmijëve dhe Shërbimit Social, me mbështetjen e organizatave partnere, më shumë se 300 psikologë, punonjës socialë dhe vullnetarë, u janë bashkuar për t’ua kthyer buzëqeshjen fëmijëve, duke ofruar shërbime psiko-sociale për çdo fëmijë, kudo ku janë strehuar familjet e mbetura pa strehë nga tërmeti, përcjell albinfo.ch.

Ministrja e Shëndetësisë dhe Mbrojtjes Sociale, Ogerta Manastirliu, e cilëson të paçmueshëm misionin për t’i kthyer buzëqeshjen fëmijëve. Ajo vlerësoi kontributin e psikologëve, punonjësve socialë dhe vullnetarëve në ndihmë të këtyre familjeve që janë prekur nga tërmeti. Ministrja takoi dhe kaloi kohë me fëmijët në të gjitha pikat e emergjencës.