Mark Gjonaj: Diaspora duhet të ketë deputetët e vet në Kuvend

"Fjala e diasporës ka peshë në zhvillimin e vendit"

Kryetari i Këshillit Koordinues të Diasporës, z. Mark Gjonaj, flet pas mbledhjes së parë të Këshillit. Sipas tij, fjala e diasporës ka peshë në zhvillimin e Shqipërisë.

Realisht një nga shqiptarët më të suksesshëm në diasporë është Mark Gjonaj. I lindur në Shtetet e Bashkuara të Amerikës, Gjonaj është sot anëtar i Këshillit Bashkiak të New York-ut. Gjonaj, gjithashtu, është një nga aktivistët më të rëndësishëm të diasporës shqiptare. Në “Real Story”, ai u shpreh se pasuria më e madhe që ka Shqipëria është populli i vet.

“Për të parën herë që u takuam ishte dje. Pasuria e Shqipërisë është populli i vetë, shqiptari. Interesi i zhvillimi të vendit është të shfrytëzohet ky rast. Dashninë që e kemi për popullin tonë dhe për vendin tonë, të shpresojmë se çfarë mundet Këshilli Kordinues i Diasporës. Është hera e parë që qeveria na mbledh”, tha Gjonaj.

Po ashtu, Mark Gjonaj u shpreh se diaspora duhet të ketë deputetët e vet në Kuvend. Sipas tij, fjala e diasporës ka peshë në zhvillimin e vendit, pasi diaspora nuk ka interes, por lufton për të mirën e Shqipërisë.

“Kam lindur në Amerikë. E shoh popullim tim, familjen time duke vuajtur. E bëj pyetjen, nëse do isha unë atje, dhe ata në Amerikë, çfarë do kërkoja prej tyre, duhet bërë sa ke mundësinë. Që të krijohet kjo ura që është shumë e rëndësishme”.

“Diaspora duhet me pas një deputet të vetin. Duhet zëri i diasporës, janë më shumë shqiptarë që jetojnë jashtë vendit se sa këtu. Një prej planeve është vota. Duhet forcuar lidhja dhe të krijohet besimi. Fjala e diasporës ka peshë, sepse nuk e ka për interes, e ka për të mirën e vendit. Nuk është shfrytëzuar ky rast i bashkimit të popullit tonë. Shqiptarët kanë influencë në shtetet ku jetojnë”, tha Gjonaj, përcjell albinfo.ch.

---