Një aeroplan iranian përfundon në autostradë, pa viktima

Është bërë e ditur se një avion iranian përfundoi në mes të autostradës, pasi doli nga pista gjatë momentit të zbritjes. Sipas informacioneve, thuhet se asnjë nga 135 udhëtarët në bord nuk u dëmtuan nga incidenti në qytetin jugperëndimor Mahshahr. Duket se avioni i Caspian Airlines ishte nisur nga Teherani, përcjell albinfo.ch.

Sipas televizionit shtetëror iranian, piloti i kreu me vonesë manovrat e zbritjes dhe kjo bëri që avioni të përfundonte jashtë piste, ndërsa nga pamjet u pa që rrotat nuk ishin plotësisht të dala, për të bërë të mundur zbritjen. Sipas një gazetari që ishte vetë në bord, rrota e pasme ishte thyer dhe kjo bëri që ai të rrëshqiste.

Duket se ky është incidenti i radhës që ndodh me avionët në Iran, pas atij që u rrëzua gabimisht nga forcat ushtarake natën e sulmit ndaj bazave amerikane në Irak.

Nga ana tjetër, Bashkimi Europian u ka ndaluar ose kufizuar dy linjave ajrore iraniane përdorimin e hapësirës ajrore për arsye sigurie. Irani kishte planifikuar që të modernizonte flotën e avionëve pas heqjes së sanksioneve në vitin 2015, si pjesë e marrëveshjes me fuqitë botërore, por në vitin 2018 administrata Trump u hoqi licencën kompanive amerikane për t’i shitur avionë Iranit.

Video