Shala: Amerika nuk e pranoi Kurtin në dialog

LDK e quajti antiamerikane partinë e Kurtit, pasi edhe i dërguari i posaçëm Richard Grenell bënte thirrje për heqje pa kushte të tarifës.

Duke qenë se mospajtimet e para publike në mes të partnerëve qeverisës, LDK e Vetëvendosje, nisën për punën e dialogut, taksës e reciprocitetit, ani se këto dy të fundit ishin edhe në marrëveshjen paraprake mes dy partive, LDK tha që duhet të hiqet taksa e të mos vendoset reciprociteti, ndërsa për këtë nuk u pajtua Vetëvendosje.

Në këtë mënyrë, LDK e quajti antiamerikane partinë e Kurtit, pasi edhe i dërguari i posaçëm Richard Grenell bënte thirrje për heqje pa kushte të tarifës. Por, edhe në mesin e LDK-së ka kundërthënie të mëdha sa i përket kësaj pune. Fillimisht, kur u paralajmërua heqja graduale e taksës e vendosja e reciprocitetit, nënkryetari i LDK-së e asokohe zëvendëskryeministri Avdullah Hoti, pati thënë në Pressing të Televizionit 7 se si të hiqet taksa, ai bashkë me Albin Kurtin do të shkojnë në Shtëpinë e Bardhë e të nisin dialogun,

“Nëse taksa hiqet nesër, ne të martën jemi në Shtëpinë e Bardhë në krye të procesit të dialogut, është kaq e thjeshtë, z. Kurti, Qeveria, z. Kurti dhe unë jemi në krye të procesit të dialogut, ne kemi ftesë tash e tri javë, hiqeni taksën, ejani në procesin e në krye të dialogut”, pati deklaruar Hoti.

Nga ana tjetër, Kujtim Shala, anëtar i Kryesisë së LDK-së, po thotë një deklaratë krejt tjetër. Ai po thotë që pavarësisht taksës, Kurti nuk u pranua nga amerikanët. “Pyetja jonë e drejtpërdrejtë ka qenë kjo, po nëse hiqen tarifa dhe reciprociteti dhe të gjitha, a do të mund t’i prijë kryeministri i Kosovës delegacionit, përgjigjja ka qenë jo nga administrata amerikane”, ka deklaruar Shala, përcjell albinfo.ch.

---