Bilanci i sotëm për koronavirusin në Zvicër

Sipas BAG, numri i deritashëm i vdekjeve është 1467. Ndërsa sipas agjencisë së lajmeve Keystone-SDA, bëhet fjalë për 1755 viktima

Në Zvicër dhe Lihtenshtajn, brenda një dite janë infektuar me koronavirus 112 njerëz, ose pak më pak se të premten kur ishin 119 ndërsa të enjten kanë qenë 179 raste të reja.

Sipas BAG, të shtunën kanë qenë gjithsej 29.817 raste të konfirmuara nga laboratori, shkruan srf.ch. Numri i rasteve zakonisht ka luhatje javore, duke shënuar rënie në fundjavë.

Sipas agjencisë së lajmeve Keystone-SDA, numri i deritashëm i vdekjeve, i regjistruar të shtunën, ishte 1755, transmeton albinfo.ch. Sipas kësaj llogaritje, kantonet Obwalden dhe Appenzell-Innerrhoden janë të vetmet pa asnjë vdekje.

Ndërkaq sipas BAG, numri i deritashëm i vdekjeve është 1467. Zyra Federale e shëndetit Publik u referohet raporteve që laboratorët dhe mjekët kanë dërguar deri në mëngjes të shtunën, si pjesë e detyrimit të tyre për raportim. BAG  thotë se në Zvicër ka 347 infeksione për 100,000 banorë.

Platforma worldometters.info jep numrin prej 1754 të vdekurve dhe 23.900 të shëruarve deri tani.

Deri më tani, janë kryer më shumë se 276,000 testime, që, sipas BAG, 13 për qind e tyre ishin pozitive, përcjell albinfo.ch. Një person mund të jetë testuar disa herë. BAG rekomandon teste për të gjithë pacientët me simptoma të Covid-19.

---