21 nga 44 udhëtarët e autobusit shqiptar donin të punonin në Gjermani pa leje

Nga marrja në pyetje doli që 21 persona synonin të hynin në Gjermani për të punuar pa pasur leje qëndrimi të vlefshme

Në mëngjesin e të hënës, 5 tetor 2020, Policia Federale ka kontrolluar një autobus udhëtarësh, me targa shqiptare në pikën e kontrollit kufitar në Walserberg (A8).

Pas një kohe të shkurtër, zyrtarët policorë kuptuan se një pjesë e konsiderueshme e grupit me 44 anëtarë po udhëtonte për qëllime që nuk kanë të bëjnë me turizmin, shkruan pnp.de.

Të gjithë burrat dhe gratë në autobus kishin me vete pasaporta të vlefshme shqiptare, por disa  prej tyre thanë se ishin në rrugë për në punë, transmeton albinfo.ch. Disa madje ua treguan policëve edhe kontratat e tyre të punës.

Por e vërteta është se ata nuk kishin lejen e qëndrimit, e cila është kushti i parë për të punuar në Gjermani.

Policia kufitare më pas mori në pyetje të gjithë udhëtarët me ndihmën e një përkthyesi. Nga kjo doli që 21 persona synonin të hynin në Gjermani për të punuar pa pasur leje qëndrimi të vlefshme.

Policia Federale ka raportuar 21 shqiptarët për përpjekje për hyrje të paautorizuar në Gjermani dhe i ka kthyer ata në Austri, përcjell albinfo.ch. Vetëm pas gjithë kësaj, autobusi ishte në gjendje të vazhdonte pasdite udhëtimin e tij të mëtejshëm.

---